Goose Bay -> Hanmer Springs -> Greymouth -> Punakaiki
Potz blitz. Hüt isch wider e mega Tour xi. Vom „wunderbare" Campingplatz isches de nach südweste gange nach Hanmer Springs. Das isch es Spa- Village die „Bärge". Det acho bini gad dirkäkt iz Hanmer Springs Thermal Pool & Spa. Ide Thermalbäder de tisch NUR vor Natur gwermts Wasser. Sprich zWasser chunnt scho so heiss usdr Quelle. Si müesses sogar abechüählä dases nid zheiss isch. Ganz speziell si d'Sulphur Pools, wo stinkä wie fuuli Eier Die ganzi alag isch übrigens dussä!!! Isch nid gad warm xi & grägälät hez ouno-sprich isch definitiv nüt für Chickens!
Nach 2h det hie ischmr de längwilig worde und ig ha wiiter wöue. Hanmer isch ganz es chliisäs, härzigs Bärg Stedtli/Dörfli. Bi det denochli umegloffe u de glii wiiter zoge.
Dür ändlos schiinändi wiitinä, Rägäwaud ähnlächi Wäuder, verbii a Riisä Hüglä, scho fasch Bärgä, isches übere Lewis Pass gange. Es isch wunderschön xi. So viel Natur und wiit u breit kei Mönsch. Geil.
Nach es paar Stung fahre bini de ar West Coast acho in Greymouth. Das isch sone richtigi „Arbeiter- Stadt". Het drum ou dr entsprächendi „Charme" Dr Campingground det hetmi nid gad agsproche. Drum hani uf mim TomTom gluegt wie wiit Punakaiki entfernt isch….nur gad 45min!!Piece of cake! Also det ane- ir hoffnig dases det schöner isch. D'Fahr isch alles ar Küste noche gange- Bombastisch!! Woni de acho bi hani de ufmne härzigä Campingplatz es Plätzli gfunge. Dä isch sogar dirkät am Strand xi woni e super Sunneuntergang ha chönne beobachte. Hetsech glohnt….

Nelson -> 1st Kite Sufrin' Lesson!!!! :oD
Nachdäm ig gester ä gmüätlächä Wandertag ir Stadt/Region Nelson ha iigleit ischs hüt angers abgange. Aaahhh!!!! Ig bi ja so närvös xi hüt am morge. Schlofä hani vor ufregig fasch nid chönnä! Was wesmi tatsächläch drfo luftet?? Jo. Am 11:30 isches de ufaufäu so wiit xi. Zrügg hani nümme chönnä. Ig bi a üse Träffpunkt a Strand gfahre. Det hani de zersch mou no 2 Schwiizer kenneglehrt- wo am reise si & är ou iz gad het afa Kite.
Und denn hani mi Instruktor kenneglehrt, dr Dev. Wie söume sech da bitte no ufe Kite konzentrierä?! Jänu. Fokussiere isch axeit xi Mir si de zämä a Strand und det hetermr de in Rueh alles schön erklärt.
Es isch u nid eifach und mäh muässäch würkli konzentriere damit eim das Ding nid irgendwo hii schriisst. Es het aber wahnsinnig spass gmacht.
Nach mire Lektion bini de mitde angere Schüeler no am Strand ghöcklät und hei zämä dene zuegluegt wos chöi.
Jo äbä am obe simer de zum Barbecue am Strand mitdr ganze Kitesurf- Gruppe. Es si aues Kite-Surf schüeler xi usdr Schwiiz, Holland und Dütschland. Super spass!
Nachem brätle simer de aui zämä zum Freedom Campingground gfahre und hei det übernachtet.

Marahau -> Takaka -> Cape Farewell -> Takaka
Hüt bini Richtig „Nordä". In Takaka hani de e Stop iigleit um d'Pupu Springs go azluege. Das isch die grössti Natürlichi Quelle in NZ. Klarer isch nur no eis irgendwo am Südpol. Im Durchschnitt chame bis uf 63m horizontal dürs Wasser xeh. Klarer cha Wasser fasch nid si. Bi det chlei im „Park" umegspaziert u hamer das ganze agluegt, was sehr schön isch xi.
Wiiter bini Richtig Cape Farewell….. Isch vrbi gange a schroffe Ladschafte, Küste & munzig chliinä, mängisch fasch verlassne Dörfli. Bim Cape Farewell, was dr nördlichschti Punkt vor südinsle isch, hani de dWanderschueh montiert und bi losgloffe. Ig ha unbedingt a Strand wöue. Nach ca. 45min. louffe, dür satt grüäni Wiisänä, überne Düünä, bini plötzläch amne ändlos würkende wiisä Sandstrand gstange. Ganz allei amne RIIIIISÄ wiisä sandstrand! WOHOOOO!!!! Bi de det am Strand chlei spaziert. Ufzmau hani de ganz wiit unger Lüt am Strand xeh. Ig hamer de dänkt ig chönnti ja, statt dr gliich wäg wider zrügg, eifach am Strand no zrügg louffe. Es wärdi ja i dämfau sicher no e angere wäg gä. Ig bide bis det ane wo die andere vorhär si xi und ha tatsächläch de o ä Wäg gfunde wo iz Landesinnere isch und markiert isch xi. Auso bini däm gfolgt. Ig bi aber gloffä u gloffä und ha eifach kei markierig und scho gar kei Mönsch atroffä. Langsam hanimr ärnsthaft afa sorge mache obi äch jemals wider zrügg chume :o/ Wonimr e Notfallplan ha überleit, bini plötzläch wider amne Strand gstange. Und…..ca. 2km wiiter unge hani de o z'Info Hüüsli ufm Hügel entdeckt woni losgloffe bi. Läck binig erliechteret xi ;oD Woni am Strand no zrügg gloffe bi, hez ufm Meer usse hunderti (ohni scheiss!!!!) schwarzi Schwän gha.
Ig bi de erschöpft (meh wäg dä närvä ;o) zrügg bim Jimbo acho und bi de gmüätläch zrügg gfahre nach Takaka woni hinech übernachte.

Takaka -> Nelson
Hüt bini meh oder weniger nur Outo gfahre. Isch chline asträngändä Wäg zum fahre xi, bsunders am Afang. Bärgli ufä, Bärgli abe, Bärgli ufä, Bärgli abä……
In Nelson acho hanimi zersch mau überne Kite Surf Schuel informiert. Das reizt mi scho lenger mau uszprobiere & Nelson isch schins DÄ Ort zum Kite.
Ig ha de am Warren vor Kitescool (www.kitescool.co.nz) aglütet. Ha de chli mitem gredet, und ihm xeit dasi würkli zimli schiss heigi, dasis aber u gärn würdi probiere. Är hetmi de chönnä überzüüge und so hani e Kurs buechet für übermorn……bi ja scho ize tierisch närvös. Was wesmi furt luftet?!? (är het zwar xeit das chönni nid passiere
So. und zur abwächslig chillis iz no chli (…….schliesslich hei ja deu Lüüt zgfüähl ig sigi ide FERIE!!!....

Wakefield -> Marahau -> Kayaking trip at Abel Tasman National Park
Ig bi gester bi Wolke und rägä hie im Abel Tasman Park acho. Bi drum gester ou nüme gross go wandere. Ig ha aber gliich ä Kayak/Wander trip buechet für hüt. Woni de iz Bett bi hanimr zimli sorge gmacht wägem Wätter Es het gschiffät wie verrukt und isch ou rächt chüähl xi.
Aber woni hüt ufgstange bi bini rächt erliechteret xi….stahl blauä Himmel und d'Sunne het glacht. Woohooo!!! (Mini Tour: http://www.abeltasmankayaks.co.nz/fullday) Hami de parat gmacht und am 8:20 bini vom Shuttle Bus abgholt worde. Im „Kayak Zentrum" simer de abglade worde und hei det ersti Instruktionä becho. Vo det us simer de IM Boot ÜBER dStrass…vomne Traktor zoge, bis zum Meer transportiert worde. Mau ganz öpis nöis Im Boot hockend über dStrass….het öpis Vo det us simer de dKüste uf bis id Tonga Bay mitem Water Taxi gfahre. Ir Tonga Bay heimer de üsä Guide troffe; dr Troy. Hohooo! Ladies….! Det heimer de vo ihm Persönlich e Kayak Instruktion becho und de isches de ouscho los gange. Hops ine i das Ding und lospaddle. Mir si nume 3 Lüüt xi i üsere Gruppe was dr Hammer isch xi. Es jungs Päärli us Holland und ig. Ig ha zKayak mitem Troy dörfä/müässä teilä Kayaking isch auso gar nid so eifach! Dä arm hetmi die ganz ziit müässä verbesserä. Bi keis Naturtalänt Wüw mr sones chliises Grüppli si xi het är ziit gha zum üs aues z'erklärä und experimäntli z'mache…. hehe.
Mir si de um d'Tonga Island paddlet wo Seelöiä läbä. So härzig! Wiiter simer id Bark Bay. Lüt ig sägä öich. Es tuet mr leid weni wider schwärmä Aber das isch absolut hammer- mega-ober-affe- geil xi!!!!! Die Stränd wos det het, wie ir Karibik! Äs tröimli!Goldigä sand, Türkisblaus Wassert….aaaahh!!! Ir Bark Bay heimer de, am Strand ire einsame Bucht, z'Mittag gässe und üsi Kayak gägä Wanderschueh iituscht. Mir 3 Touris heinis de zämä z'Fuess ufgmacht zrügg richtig Anchorage. Ca. 3h. Dr Troy heimer leider müässä zrügg loh.
In Anchorage acho heimer de nochli ziit gha zum Bade u si när vo det abgholt worde mitem Wasser taxi zrügg nach Marahau. Isch en mega Usflug xi. Mit super Lüt ire Hammer umgäbig. Wow. Sprachlos------

Picton -> Havelock -> Nelson -> Wakefield
Hüt bini gmüätläch ufgstange. Was a rough night again mit starkem Wind und viel Rägä. So isch denn ou dr morge xi :o/ Vorm mittag bini de über d'"Quenn Charlotte Scenic Drive; a Narrow winding road" in richtig Havelock gfahre. Ou die Strecki isch, wies dr Name scho seit, z.T. wider extrem schmal und beiidruckend kurvig xi…
Ig bi de in Havelock; (=the Green Mussle Capitol of the world) gad diräkt in Mussle Pot. Das isch s'Restaurant wos agäbläch die beste Muschle vor Wäut giit. Ig hamer fest vorgno z'probiere. Dinne hani de gfragt obs müglech sigi 1 oder 2 Müscheli z'probiere, d'Kellnerin hetmer aber ganz schroff klar gmacht das das uf kei Fall göngi. Bitte was?!? Schliifts?! Bini haut wider gange ohni Müscheli z'probiere. Dr Wiuä wär da xi wider xeht!!!

Bi de wiiter gfahre nach Nelson. Je nöcher dasi Nelson bi cho, desto schöner isch z'Wätter worde. Si säge Nelson ou d'Sunne stube vo NZ. Bi de iz Zentrum und bi det chli umegspaziert. Nelson isch es wunderschöns Stedtli, mit viel Böim und Blüämli u vilnä härzigä Lädeli. Extrem pflegt. Hami de no zumne ganz spezielle Lade begä. Jens Hansen Goldschmied.(http://www.jenshansen.com/collections/lordoftherings.aspx) Das isch dä Goldschmied wo The One Ring für Herr der ringe gmacht het. Woni bim Lädeli bi acho isch d'Lady gad am Türe abgspliässä xi. Ig hare xeit ig sigi äxträ wägem The One Ring cho. De hetsimi de no hurti inegla zum umeluege Det ischer xi; dr Prototyp- AWESOME!!! Hetmer öper $5000.- ?!

Ig bi de nach au dere ufregig nochli dürs Stedli spaziert u hami de när mou ufgmacht ufd Suechi nach mim Schlafplatz für hüt. Für das bini iz Edward Baigent Reserve nach Wakefield gfahre. Es wunderschöns Pärkli wome max. 2 Nächt gratis darf übernachte. Woni acho bi si 6 grossi Camperbusse det parkiert xi & 8 „elteri" Lütlis amne Tisch am höckle. Hui hei die mi läng agluegt woni bi cho. Aber ig ha de parkiert, bi zuene härä, hami vorgstellt, sä gfragt obs ok sigi weni hie übernachti & dä manne es Bier brocht. So hani scho wider 8 Fründe meh gha hehe…..

Bi de chli später zum Camper aluege iiglade worde……UND nogad zum z'nacht Bis z'nacht am 11:00 simer det ghöcklät, ig mit de „Pensiorä" & hei über die vilä Reisä wo si und ig scho gmacht hei plöidärlät. Super sach! Bi zimli begeisteret vode Pensionäre hie. Die chouffäsäch e Camper hie und tukkerlä gechillt dürs Land, wie cool isch das bitte?!?

Wellington ->(Fähri) Picton!!!!Hello South Island!!!!
Hüt isch dr Tag xi. Ig ha ar Nordinsle Tschüss xeit & ar Südinsle Heelloooo!!
Am morge am 5:45 ufgstange; bini de am 7:00am ufs Schiff. Das isch heftig xi. Ig bi no nie ufemne so grosse Schiff xi, scho gar nid mitem Outo drufgfahre. Krass!
Ig ha ufm Wäg ufs Deck ä jungi Düütschi kennäglehrt. dMaya. O si isch allei am umereise.
Womer in Welly si usgloffe hets de angers afa Wäuällä. Hhmmhh….bi extrem Seekrank wordä …..nach „däm" ischsmr aber de chli besser gange und ig ha de dLandschaft o chönnä gniässä. Ufm Wäg nach Picton dürfahrtmä dMarlborough Sounds Ganz schön!

In Picton acho bini de chli ga zStedtli aluege undmi ga informiere. zStedtli isch ganz härzig, mitemne gwüssä Charme. Eifach schad das sWättär nid mitgspielt het und relativ chüel isch xi. Drum hani mi när ou glii einisch ufgmacht i Campingground, woni wider ä coolä obe ha gha mit viilnä nättä Kiwis und 2 Schwiize...vo Adubodä

Hüt isch Stadt erkundä agseit xi. Am morge bini aus 1. Gad nach Miramar (e Stadtteil vo Wellington) id Weta Caves (http://www.wetanz.com/cave/) gfahre. Das isch d'Company vom Peter Jackson gründet, wo d'Filmfigure, Maske, Special Effects etc. für King Kong, Narnja, Avatar UND ganz speziel für Herr der Ringe gmacht het. Mi cha det leider nid säuber ga ineguggä aber e spannende Film chame xeh über d'Gschicht vor Firma und d'arbeite wosi mache. Näbscht däm chame es paar Figure aluege sum Film und The One Ring us LOTR heisi ou det!!! Cindy exciteeeed!
Wiiter bini Downtown go mis Outo parkiere und bi losgloffe dürs Zentrum. Wellington isch gar nid gross. zZentrum isch extrem übersichtlich. Het „nur" um die 450'000 iiwohner. Bi de iz Te Papa Museum. Det heisi vor Entstehig vo Erdbebe, Tsunamis, NZ Gschicht, Maoris etc. praktisch alles usgstellt.
Nach so viel Natur und rueh isches rächt asträngänd xi ir Stadt. Ig bi drum zimli müäd xi und froh xi hani wider ufe Campingplatz chönnä.

Wanganui -> Wellington -> Upper Hut
Isch feiächline fahrt xi wider hüt. Aber irgendwenn bini de in Wellington dochno acho Ig bi de diräkt zum Mt. Victoria gfahre. E bewaldete Hügel z'mitzt ir Stadt. Es si det es paar Szene für LOTR dräit worde. Z.B. die wosich d'Hobbits ungerem Boum vorem Nazgul verstecke. Ig bi de chli im Waud umegloffä & ha die „Sites" entdeckt. Cindy auf den spuren der Hobbits!
Aus nächschts bini de id Stansborough Mill (http://www.stansborough.co.nz/home/page.aspx). Das isch ganz ä exklusivi Wäberei wo aui Kostüm für LOTR gmacht het/macht. Ig ha die verschiidänä Umhäng chönnä aluege……UND sogar ä Original Hobbit Umhang dörfä alege. GEIL!!! Chostäpunkt vo somne Umhang $800.-
Vo det us bini de ufä Campingplatz gfahre usserhaub vo Welly, u has für einisch chli chillt…..

Tongaporutu -> Wanganui
Hüt am morge hanis gmüätläch gno. Ig ha ja uf d'Ebbe vom 14:00 müässä warte Nache z'morge hanimi vor Margret&Alan verabschidet (sie si wiiter zoge ). Ig bi de vo det us dr Hügel ufägfahre uf dr suechi nach Mc Kenzys Bluff. Im NZFrenzy steit det heigs bi Fluet riiiiisiigi Wäuä wo gägä Klippä brätschi. Ig bi de ä bitz gfahre, uf z'mau isch det aber es Iisägatter xi. Hani dr Jimbo haut lo stoh und bi zFuess wiiter. Nachemne guete Stück ischmr de es Päärli entgägä cho. Isch uscho das sie vo Montreal si, dr gliich Reisefüährär hei und z'gliiche sueche wie ig. Auso heimeris de zämä ufä wäg gmacht. Zimli ratlos simer ir Bampe ussä umägirrt Ufem Fäud usse hets aber e Schuppä gha, het usgseh aus würdsi det inne Schöfli schärä. Ig bi de de a däm Schüppli ga achlopfä. Isch ä Kiwi cho uftue und hetmi ganz läng agluegt. Ig hanim de erklärt wasmer sueche. U hilfsbereit hetermr de dr wäg ganz genau ärklärt. Sogar bim Schöfli schärä hani no chönne zueluege…..ooohhhh!!!!! Ig ha de die 2 Kanadier bi mir i Jimbo iiglade & los simer gfahre zu Mc Kenzys Bluff. Boah! Mir si obe ufde Klippe gstange, unger üs si riisigi Wäue dra donneret. Es wahnsinns Gfüähl! Mir hei de das Schouspiel nochli beobachtet und is de irgendwenn wider ufä Rückwäg a Strand gmacht.
So um die 14:00 isch de z'Wasser afe so wiit zrügg gsi, dasimi ha chönnä ufä Wäg mache. Hamer dä aber feiechli müässä sueche ar Klippe nache, a Höhline verbii, dür Buchhöchs Wasser. Denn, wonis gschafft ha isch ume Egge e riiiesige, unberüährtä schwarze Sandstrand zum Vorschiin cho. BOAH!!! So amazingly breathtaking! Es isch run-on-the-beach-laughin'-cuz'-ist-so-freakin'-georgous xi!! Ig weiss, es tönt vilicht so aus würdi zimli übertriibä, aber äs fählä eim würkli dWörter weme so öpis schöns wot beschriibä! Ig bi de dr Strand uf und ab gloffä und hau Fötälis gmacht.
Irgendwenn, nachdäm i gmerkt ha dasi üble Sunnäbrand bechumä hanimi de vo däm Stückli „Heaven" chönnä lösä & bi wiiter brummt.
zZiel isch Wanganui xi. dStrecki det ane isch übelscht müäsam xi. Nid wäg dr Stross, sondern wüws gluftät het wie die %ç+* und ig dr Jimbo ha müässä häbä wi verrukt.
Bi schön froh xi woni im Campground bi acho.
Am obe bim ässä hani de es paar Jungs kennäglehrt wo det ir Region schaffe. Mit ihne hani de bis spät id Nacht 2 ½ Men gluegt. Super xi!